Një përkufizim i mëkatit do të ishte: “mënyra e jetesës që tregon indiferencë dhe rebelim kundër Perëndisë quhet mëkat”
Sa i keq është mëkati dhe si do të mundej dikush ta maste atë? Ne masim lartësinë e maleve ose thellësinë e deteve në metra. Masim shpejtësinë e aeroplanëve në kilometra për orë. Ne masim vëllimin e lëngjeve në metra kub.
Po mëkati! Si mund ta masim sa i keq dhe i madh është ai? Mund të japim ca shembuj ekstremë të mëkatit, si p.sh. Hitleri në luftën e dytë botërore vrau 6 milionë hebrenj. Mund të mendojmë për abortin që merr jetën e 1.6 milionë fëmijëve të pafajshëm në të gjithë botën. Po kur kthehemi tek vetja, sa keq është? Ne mund të krahasojmë veten me mëkatin e të tjerëve dhe i mbushim mendjen vetes që jemi të mirë. Shumë herë e mohojmë që kemi bërë diçka gabim duke fajësuar të tjerët. Meqë mëkati është kaq i zakonshëm në jetën tonë, bindim veten që nuk është serioz. Por Bibla, Fjala e Perëndisë thotë: “të gjithë kanë mëkatuar dhe nuk e arrijnë lavdinë e Perëndisë (Rom 3:23).
Në fakt është Kryqi ai që jep matjen e saktë të mëkatit përmes syve të Perëndisë. Eshtë Kryqi që zbulon se Zoti e urren mëkatin. Zgjidhja e Perëndisë për të hequr mëkatin nga jetët tona është kryqi. Dikush duhet të vdesë që të paguajë për mëkatin. Ky është çmimi i mëkatit. Jezu Krishti, Biri i Perëndisë, bëhet zëvendësuesi në kryq për mëkatin tonë. Letra drejtuar kishës në Filip, 2:8 thotë se “duke u gjetur nga pamja e jashtme posi njeri,[Jezusi] e përuli veten duke u bërë i bindur deri në vdekje, edhe deri në vdekje të kryqit”. Kryqi shkakton vdekjen e pafajshme të Birit të Perëndisë duke u sjellë falje atyre si ne, që kanë mëkatuar kundër Zotit.
Vdekja nuk është fundi i historisë për Jezusin. Ai u ringjall duke garantuar jetë të përjetshme për të gjithë ata që besojnë në të si Zot dhe shpëtimtar. Kjo dhuratë është për ty në këtë pashkë.
IJR 2024